xoves, 17 de novembro de 2022

Rabo Rizado cambia as reunións

 Os lectores e lectoras de banda deseñada decidiron cambiar as súas datas para a reflexión lectora: deixan as reunións semanais, nos recreos dos venres, para xuntarse un xoves ao mes, durante a hora do xantar. Eses bocadillos e ensaladas compartidas xa lles permiten ir falando das súas lecturas... E do humano e o divino.

Hoxe, nunha reunión minguada outra vez polos exames, deixaron atrás a Tintín para adentrarse en A mansión dos Pampín. Tamén houbo tempo para... falar das súas lecturas favoritas: Javier acaba de reler, e recomendarnos, O mono do asasino; debater sobre porque unha mesma obra nos gusta a uns e a outros non, neste caso Heartstopper foi do agrado de Meriem, pero Antón non foi quen de rematala; para que Sofía nos contase como Yo no quiero ser princesa, lle axudou a comprender a evolución nos nosos soños no paso da infancia á adolescencia; e para que Noa se centrase no acoso escolar mentras que Minia non consideraba que houbese unha lectura que a marcase.

María, a súa coordinadora, faloulles dun prexuízo bastante común sobre o cómic: non é un xénero para adultos. Que enganados están algúns e algunhas.

Estes lectores e lectoras queren darlle as grazas a María, da cafetería, por atendelos durante o tempo no que podería estar descansando.



venres, 11 de novembro de 2022

Día das librerías

Poida que a celebración deste día non sexa máis que outra das múltiples campañas que nos animan a consumir, mais neste caso a Trama Irmau quere aproveitar o día para darlle as grazas á Librería Moito Conto por permitir aos seus lectores e ás súas lectoras remexer entre os libros, buscar, mirar e devolver ás mesas; por falarlles das obras que acababan de recibir; por comentarlles que libros estaban tendo tendo éxito entre os rapaces e as rapazas da súa idade; e ata por brindarse a facernos fotos ben xeitosas. 

Así que, Moito Conto, moitas grazas.





xoves, 10 de novembro de 2022

ABCD en acción

 Mirade que contenta temos a Rosalía!!! Non é para menos, cada xoves é unha asistente máis á reunión do club de lectura de aventura e de seguro que desfruta dos comentarios destes pequenos e pequenas lectoras coordinados por Sylvia Cea.

Hoxe estaban poucos, seica tiñan exame, pero as súas cariñas dino todo.